قارورة
الملا باسم الكربلائي
الشاعر : أحمد الذهبي
ياقارورة دمه الغالي على احبابي انشغل بالي
اراقب واني حذرة الرسايل كلها خطرة
اول مراسيل الحزن نسمة هوا جايبها لي
مخنوق اجا بصدري النفس شميته بيه ريحة هلي
من والدي جايب عطر مو ذاك عطره الأول
بيه ريحة الفاقد ولد يمكن مشه الاكبر علي
ياقارورة واخاف اني تجرحني بخبر ثاني
واموتن قطرة قطرة الرسايل كلها خطرة
ثاني رسالة من السفر مكتوبة لي بقطرة دمه
قالت لي عطشان الورد مات الندى ويشرب ضمه
عبدالله مو ذاك الطفل كن والدج شايل سما
اترف قرابين العشق راد لحبيبه يقدمه
رسمتيلي ياقارورة .. مهد خالي بحضن صورة
اثر دم على صدره الرسايل كلها خطرة
ثالث مكاتيب البعد هذا اصعب واكثر خطر
يحجي لي سالوفة سما مثلومة ويطيح القمر
من يحضن بروحه الجرح يشبه نهر حاضن نهر
مو ظهر ابويه المنحني ظهر الزمن كله انكسر
لقاه كاتب على جروحه غلاة اخته مثل روحه
وطلب زينب تعذره الرسايل كلها خطرة
اما الرسالة الرابعة لونج ياقارورة اختلف
لون الدمه تحول إلى حنة عريس بلايا كف
لوالدته ينزف رادته زفوه على جروحه ونزف
وصورة بدر ينزف ضوى صورت لاحساسي ورجف
وانا وروحي وخناجرها مثل رملة ومشاعرها
الحجر بالنوح افطره الرسايل كلها خطرة
لحظة ووصل مني الهجر اصعب مراسيل الالم
شكلج ياقارورة اختلف صار اسود وقلبي انصدم
مستغربه وفكري انذهل حزنج على ارموشي انرسم
ليل الله باحضانج نزل لو هذا دخان الخيم
جمر غربه وحرق خيمه وانا بعيني الدمع غيمه
مطر وخدودي صحرا الرسايل كلها خطرة
واخر رسالة من النحر قلبت موازين الزمن
قارورة الدم امتلت وتبدت وفاض الوطن
صدرك عليه حافر فرس والخد بالرمال اندفن
وصفوا لي بجروحك شمس وجروحي ما يتوصفن
على جروحك قمر غافي وانا بروحي نجم طافي
وطفى العالم بأسره .. الرسايل كلها خطرة
No comments:
Post a Comment